நன்நடத்தையால் விடுதலையாகி மீண்டும் 9 வயது சிறுமியை கற்பழித்து கொலை செய்தவன் கைது

மகாராஷ்டிரா மாநிலம் அகமத்நகர் மாவட்டத்தை சேர்ந்தவன் சுனில் சுரேஷ் (32). கடந்த 2002-ம் ஆண்டு நாசிக் மாவட்டத்தில் உள்ள சினார் பகுதியில் வசித்து வந்த சிறுமியை கற்பழித்து கொலை செய்த குற்றத்துக்காக விசாரணை நீதிமன்றம் இவனுக்கு மரண தண்டனை விதித்து தீர்ப்பளித்தது.

இந்த தீர்ப்பை எதிர்த்து மும்பை உயர்நீதி மன்றத்தில், சுனில் சுரேஷ் மேல்முறையீடு செய்ததன் பேரில், மரண தண்டனையை 17 வருட கடுங்காவல் தண்டனையாக குறைத்து நீதிபதி உத்தரவிட்டார். நாசிக் சிறையில் தண்டனை அனுபவித்த வந்த அவனை, கடந்த ஆண்டு மே மாதம் நன்நடத்தையை காரணம் காட்டி சிறை நிர்வாகம் விடுதலை செய்தது.

இந்நிலையில், கடந்த மாதம் 28-ம் தேதி, ஷிர்டி ரெயில் நிலையம் அருகே 9 வயது சிறுமியின் பிணத்தை போலீசார் கைப்பற்றினர். பிரேத பரிசோதனையில், அந்த சிறுமி கற்பழிக்கப்பட்ட பின்னர் கழுத்தை அறுத்து கொல்லப்பட்டது தெரியவந்தது. குற்றவாளியை பிடிக்க போலீசார் தீவிர விசாரணை மேற்கொண்டு வந்தனர்.

நாசிக் அருகே உள்ள மன்மட் ரெயில் நிலையம் அருகே சந்தேகப்படும் வகையில் சுற்றிக்கொண்டிருந்த சுனில் சுரேஷை போலீசார் பிடித்து விசாரித்தபோது 9 வயது சிறுமியை கற்பழித்து கொன்ற பின்னர், பிணத்தை ஷிர்டி ரெயில் நிலையம் அருகே வீசியதை அவன் ஒப்புக்கொண்டான். இதையடுத்து, அவனை கைது செய்த போலீசார், நீதிமன்றத்தில் ஆஜர்படுத்தி மீண்டும் சிறையில் அடைத்தனர்.

அவன் மீதான வழக்கின் விசாரணையை விரைவு நீதிமன்றத்தில் நடத்தி, மரண தண்டனை வழங்க வேண்டும் என்று பொதுமக்கள் கூறுகின்றனர்.